කැතීගේ හදවත, ඉරි තැළුණු පොළොවෙන් මතුවූ දිය උල්පතක්, බුබුළු දමන්නාක් මෙන් පිනා ගියේය. සදහට ම වැළලී ගියයි සිතා සිටි බලාපොරොත්තුවේ අතු රිකිල්ලට නැවත පන ලැබී තිබේ. ඉහළට ඉහළට නැගී එහි නැවුම් කොළ පැහැති පත්‍ර, සුළඟේ ලෙලදෙයි. නොබෝ දිනකින් එහි පූදින සිඟිති මල් පොහොට්ටු තමා සමග සිනාසෙනු ඇත. එහෙත් මේවා ගැන සිතමින් ළතැවීමට කාලයක් නැත. "එන්න ට්‍රුඩි පැටියෝ, අපි ඉක්මනට යමු." කැතී සම්පටිය අතට ගත්තා ය.