කුඩා කුඩා බැකෝ යන්ත්‍ර
__________________________
කුඩා කුඩා කුඩා බැකෝ යන්ත්‍ර මහපාරක් කපනවා
දෙපා රෝද හරව හරව  _පොළොවේ පස් ගලව ගලව
කුඩා කුඩා බැකෝ යන්ත්‍ර මහපාරක්  කපනවා
දහය හමාරට  වාගේ_තේ ජෝගුවෙ වටේ ඉඳන්
කුඩා කුඩා බැකෝ යන්ත්‍ර ගස් යට හති අරිනවා
දවල්ට එන බත් මුල් ටික_උඩින් උඩින් අනලා ගිලලා
කුඩා කුඩා බැකෝ යන්ත්‍ර ගස් යට විට හපනවා
ඇණමුරිච්චි කකියන  කොට
පපුවෙ ඔයිල් හිරවෙන කොට
කුඩා කුඩා බැකෝ යන්ත්‍ර ග්‍රීස් ගාලා නානවා
නාන ගමන් ගල්පොතු උඩ මලකඩ පිට උලනවා
කුඩා කුඩා බැකෝ යන්ත්‍ර
බූරු ඇඳන් උඩ නැඟගෙන
රෑට ඕමි බලනවා
එහෙම ඕමි බලන ගමන්
පුංචි රේඩියෝ එකකින් සිංදු අරන් අහනවා
බැකෝ යන්ත්‍රයක අත රැඳි
ඉස්කෝප්ප කොළ රැජිනට
නැවිකට් දුම වදිනවා
රැජිණ වීජිනිපත වන වන අතින් නහය වහනවා.