මම කහ පැහැති ලී කුඩු මතින් නග්න දෙපා තබමින් සීරුවට ඇවිදිමින් සිටියෙමි.මගේ දෙපා රටාවට අනුව ලී කුඩු පහළට එබී ගියේය.දෙපයට දැනුණේ සුවදායක බවකි. එහෙත් ලී කුඩු තට්ටුව තුනී වූ තැනක මගේ දෙපා සටහන් ඇඳුනේ නැත.එයින් කනස්සලු වූ මා සෙමෙන් ඉදිරිය බැලුවෙමි.

සන්ධ්‍යාවට අනුගත ලා අඳුර විසින් පරිසරය සෙමෙන් කළුවර කරන බවකි.පසෙක උසට වැවී තිබූ තේක්ක ගස් ගොන්න මැදින් සිහිල් සුළඟක් හමා ආවේය. ඒ සුළඟට මුසුව තිබුණේ ලී පදම් කිරීමට සහ වතුරෙන් ආරක්ෂා කිරීමට මගේ තාත්තා ඒවා මතට ආලේප කරන ආලේපනයේ සුවඳයි.