කෙලිත්තක්...
ඔව්,
හැඩකාර කෙලිත්තක්
සරයි අරගල බිමෙහි
කඩිසරව

අනෝරාවක පෙර නිමිති දැක
සසළව
ඒ නමුදු දැඩි සිතින්
පා නැගුවාය ඇය,
සටන් පාඨ නගනා
තුරුණු කැළ වෙත

අනෝරා වැස්ස අරඹිණ.

මහ වැසි නොතකමින්
තුරුණු හඬ ගිගුම් දෙයි
පුරවා උණුසුම් හුස්ම
තුරුණු පපු කුහර තුළ

හැඩි දැඩි තුරුණු කැළ මැද
සියුමැලි ඇගේ හඬ මතු වෙයි
බිඳ, බක්මහ අකුණු තෙද
නැගෙයි නැගෙයි එය අහසට
උඩුකුරු තෙරපුමක ජවයෙන්

තෙතින් තෙතබරිව,
දියෙන් දියබත්ව
මුවාවට මුවාවක් සොයාගෙන,

සඟවා ළෙහි මෙතෙක් රැකි
කුරුළු පිහාටුව රැගෙන දෝතට
සිඹ,
යළිත් ළෙහි හොවා එය
දිව යයි

ඇවිල යයි
තුරුණු පපු කුහර තුළ
උණුසුම් හුස්මක්ව