මෙහි කතාවට පසුබිම සපයන්නේ ඉතා සාමාන්‍ය, කුසීත, වාණිජ නගරයක් වූ ඔරානයයි.
ඒ නගරයේ හුරු පුරුදුවලට වහල් වී දිවි ගෙවන නිද්‍රාශීලී ජන සමාජය තුළට පැමිණි භයානක වසංගතයක් ගැන කියැවෙන මේ කතාන්දරය වර්තමානයේ අප අත්විඳින දැයට සමපාත වන්නේ විස්මිත ලෙසකිනි. එයින් මේ විශිෂ්ඨ සාහිත්‍ය කෘතියේ ඇති විශ්වීය සහ අකාලික බව මොනවට පිළිබිඹු වෙයි.
කැමූ සිය කෘතියෙන් තනි පුද්ගලයකු ලෙස මිනිසාට සිය ඉරණම කෙරේ බලපෑම් කිරීමේ ඇති නොහැකියාව, අර්ථ ශුන්‍ය ජීවිතයේ ඇති විපරීත ස්වභාවය, නිදහස, අරගලය, ප්‍රේමය යන තේමාවන් සැලකිල්ලට බඳුන් කරයි. ඔහු පෙන්වා දෙන හැටියට මිනිස් ඉරණම කෙතරම් විකාරරූපී වුවත් නිදහස උදෙසා කෙරෙන අනවරත අරගලය තුළින් ඊට අර්ථයක් එක් කළ හැකියි.
එලෙසම, ප්‍රේමය, වියෝව, ආගමික ඇදහිලි මිත්‍රත්වය යනුවෙන් අප පිළිගෙන, විශ්වාස කරමින් සිටින දේ පිළිබඳ නියම ආලෝකනය ලැබීමට නම් ඔබ වසංගතයකට හසු විය යුතු බවත් ‘‍මහාමාරිය’ විසින් අපට කියනවා විය හැකිය.