පි‍්‍රයංකා අමරතුංග මහත්මිය විසින් රචිත කොටස් තුනකින් යුතු ‘මට අහිමි මම’ කෘති පෙළේ අවසන් කොටසයි. මෙම කෘති පෙළ මීට පෙර ‘මා ද ඔබම විය’ නමින් ටෙලි සිතුවමක් ලෙස ස්වාධීන රූපවාහිනිය ඔස්සේ විකාශය විය.
මෙම ටෙලි පිටපත කලක සිට අධ්‍යයනයකින් පසු ධීවර ගම්මානයක් ආශි‍්‍රතව ලියන ලද්දකි.
------------------
”තනි තීරණේට දෙමාපියන්ගෙන් වහන් වෙලා මයිකල් එක්ක දීග ආව දවස මේ බිත්ත හතරෙ කොටුවෙලා ඉන්දැද්දි මට හැම තිස්සෙම මතක් වෙනවා, මයිකල් කියපු විදියට මුහුද අයිනෙ තියෙන පුංචි ගේක ලස්සන ජීවිතයක් ගෙවන්න හීන මවාගෙන ආවත්, එ් හැම හීනයක්ම හීනම තමයි කියලා මම දැනගන්න කොට ආපහු හැරෙන්න බැරි තරම් දුරක් මං ඇවිත් ඉවරයි. කඩිමුඩියෙ දීග යන හැම ගෑනියෙක්ම නිවීහැනහිල්ලේ පසුතැවිලි වෙනවලූනේ.
කොහොම වුණත් කසාද බැඳපු මුල් කාලෙ අගහිඟකම් මැද්දෙ වුණත් අපි දෙන්නා සතුටින් ජීවත් වුණා. අර කතාවකුත් තියනවනෙ අගහිඟකම් ඉස්සරහ දොරෙන් එබිකම් කරනකොට ආදරේ පස්ස දොරෙන් පළා යනවා කියලා. දෙන්නා තුන්දෙනා වෙන්න ඉන්නකොට අපටත් සිද්ධ වුණේ ඒක. ගෑනු අපි ප‍්‍රශ්න මත්තෙම හැපි හැපී ජීවත් වුණාට හැම ප‍්‍රශ්නයක්ම අමතකර කරන්න කියලා පිරිමි ළං වෙන්නෙ ගිනි වතුරට.
ගෙදර පිරිමියා ප‍්‍රශ්න අමතක කරන්න ගිනි වතුර බිව්වට අපට තිබුණු එකම ප‍්‍රශ්නෙකටවත් උත්තරයක් ලැබුණෙ නෑ. අන්තිමේදී මට සිද්ධ වුණේ අපේ ප‍්‍රශ්න විසඳන්න දෙයියෙක් වගේ ආව රාස්සයෙකුට මගේ මුළු ජීවිතේම බාර දෙන්න. එ්කම මහා ප‍්‍රශ්න ගොඩකට මුල වේවි කියලා කවුද හිතුවෙ?”