"උඹේ කරුමේ ගෙවන්න ඕනී උඹමයි."

කඩුල්ල ළගට එනකල් පස්සේ ආව මදමල් කුමාරි සුරං ගුරුන් කඩුල්ල පනිද්දි කියුවා. හීලෑ කරගත්ත , මායමට පටලව ගත්ත, ගුරුකමකින් බන්දව ගත්ත ස්ත්‍රී පරාණයක්, යකින්නක් වුණත් පැදුරට ගත්තට ආලවන්ත කමක් හිතේ පිරෙන්නේ නෑ . පැදුරෙදි මොන ආලවන්ත ලීලයෙන් පෑවත් ආලයෙන් කෙඳිරුවත්, රතියත් කෙළවර ඒ හැමදේම හිඳෙනවා. මදමල් කුමාරිත් බන්ධයකින් පැලේ අඹුවක් වුණ යකින්නක්. ඒකී සුරං ගුරුන්ට මූලිච්චි වෙන්නේ ගමේ ඈත කොනේ මහ මුකලානේට මායිමේ, හේනක පිරිමියෙක්ට නූලක් මතුරන්න ගිහින්. ඒ පිරිමියාට රාත්තිරියක් පහන් වෙනකල් මදමල් කුමාරි දසවද දීලා.