නොපිපි පියුමක
නොලියු කවියක
සිහිනයක් සේ රැදී ඇත
අහිමි පෙමක සුවඳ

නව පරපුරේ කවියෙකු වන සුපුන් අතුකෝරලගේ ‘පේ‍්‍රමයට ඉඩක් ඇත’ කාව්‍ය සංග‍්‍රහය දැන් නිකුත් වී ඇත.

දශකයට අධික කාලයක් මුඵල්ලේ පේ‍්‍රමය, සමාජ ගැටලූ, පන්ති භේදය, ජනවාර්ගික අර්බුදය වැනි විවිධ තේමාවන් යටතේ ලියුවුණු කවි 37 ක් මෙම ග‍්‍රන්ථයට ඇතුළත්ය. එහෙත් සුපුන්ගේ කවි අතර කැපී පෙනෙන ලක්ෂණය වන්නේ ඔහු පේ‍්‍රමය හා  විරහව යන විෂයට යොමුවන විට කාව්‍ය රචනයේ දක්වන කැපී පෙනෙන කුසලතාවයයි. ඉතාම පරිස්සමෙන් වචන භාවිතා කරන කවියා, සිය කවිය රසිකයා හට විඩාවක් නොකරන්නේ තම නිර්මාණය සියුම් සංවේදනාවන් දන්වන කලාපයක් බවට පත්කරවමිනි.

එහෙත් ඔහු පේ‍්‍රමයට පමණක්ම සීමා නොවී සිය කවිය තුළින් එදිනෙදා ජිවිතයේ විවිධ අවස්ථාවන් ග‍්‍රහණය කිරීමට ද උත්සහ දරයි. විටෙක ඔහුගේ කවිය අප සමාජය තුළ පවතින යුද මානසිකත්වය ඉතා නිර්දය ලෙස ප‍්‍රශ්න කරයි. නන්දිකඩාල් කලපුව, සාලාව ගිනිගනී, අවැසි නිදහස, යුද්ධය නිමවී වසරකි වැනි කාව්‍ය නිර්මාණ ඔස්සේ ජාතිවාදියට එරෙහි මෙම කවියාගේ පුඵල් මානවීය දැක්ම විදහා දැක්වෙයි.

"කවිය යනු මූලික වශයෙන්ම සෞන්දර්ය වස්තුවකි. භාෂාව භාවිත කර සෞන්දර්ය වස්තුවක් නිර්මාණය කිරීමෙන් ඒ වස්තුව ඇසුරු කරන අය වෙත චමත්කාරය ප‍්‍රදානය කිරීම කවියාගේ කාර්යයි. ඒ සෞන්දර්යය වස්තුව තුළ යම් යම් තේමාත්මක මානද පවතී. ඒ නිසා කවියට මනුෂ්‍ය සංවාදවලට දායක වන්නට පුළුවන. සුපුන් අතුකෝරල ඒ අර්ථ දෙකෙන්ම කවිය හඳුනා ගෙන ඇත" සුපුන් අතුකෝරලගේ ‘පේ‍්‍රමයට ඉඩක් ඇත කෘතියට පෙරවදනක් ලියමින් මහාචාර්ය ලියනගේ අමරකිර්ති පවසා සිටී.