Kiss The Dust කෘතියේ සිංහල පරිවර්තනයයි.

"තමන්වම රවට්ටගන්ඩ එපා දරුවො.. ඒ ගෑනි මොනවද මේ දේවල් ගැන දන්නෙ..? එයා බාගෙට කුර්දි වෙච්චි පලියට.. මේ යුද්දෙ තව අවුරුදු ගාණක් තියෙයි.. ඒක නෙවෙයි.. අස්ති ගැන මොකද..? උන් සලකන්නෙ අස්ති යුධ සේවයෙන් පැනලා ගිය කෙනෙක් හැටියටනෙ.. ලියකියවිලි ටික යැව්වට පස්සෙත් හමුදාවට ගියේ නැත්තං යුද සේවයෙන් පැනලා ගිය කෙනෙක් හැටියටයි ගණන් ගැනෙන්නෙ.. ඒ විදිහට බලනකොට කැක්සොරාන් කරල තියෙන වැරැද්ද ඒ වගේ දහ ගුණයකටත් වැඩියි.. ඒ ගොල්ලො ආයෙමත් මේ සුලෙයිමානියාවට මූණ පෙන්නන්ඩ හිතන් ඉන්නව නං ඒක මහ විකාර කල්පනාවක්.. ඔයාගෙ සෙන් මස්සිනාට වෙච්චි දේ මතකනෙ.. අර මොසුල් වල උන්නු ටෙලිවිෂන් ගෙන්නලා විකුණාපු මිනිස්සුන්ට වෙච්චි දේවල් මතකනෙ.. එතකොට...."
"අනේ එපා.. ඕක නවත්තගන්න.." ටෙරිස්කා ඛාන් දෝතින්ම කන් දෙක වහගත්තා. "මට ඔය දරුණු කතා තවත් නම් කියන්න එපා අම්මේ.. මට ඉවසගන්න බෑ.."
"ඒ කියන්නෙ..." තාරා ඇහුවා.. "තාත්තයි අස්තියි ආපහු එන්නෙ නෑ කියලද.. කවදාවත්..?"
"එයාලා එයි.. එයාලා අනිවාර්යෙන්ම එයි.." අම්මා කිව්වා.
"නෑ එයාල එන්නෙ නෑ.." අත්තම්මා මහ නපුරු විදිහට කිව්වා. "ඒ ගොල්ලන්ට ආපහු එන්ඩ බෑ.. අඩු ගාණෙ මේ යුද්දෙ ඉවර වෙනකල්වත්.. අඩු ගාණෙ අලුත් ආණ්ඩුවක් පත් වෙනකල්වත්.. ඔයගොල්ලන්ටත් වහාම මෙහෙන් යන්ඩ වෙනවා.."
"මෙහෙන් යන්න..? මේ ගෙදරින් යන්න..? කොච්චර කාලෙකටද..?" තාරා ඇහුවා.
"මගෙන් අහන්ඩ එපා දරුවො.. මේ යුද්දෙ ඉවර වෙන්නෙ කවදද කියල මං දන්න එකක්යැ.. ඒ ගැන කියන්ඩ කවුරුද දන්නෙ..?"