ඉන්දියාවේ උසස් මධ්‍යම පන්ති පවුලක උපත ලැබූ කිරන්ජිට් අහ්ලුවාලියා 1979 වසරේ එංගලන්තයට පැමිණියේ තමා කිසිදින දැන හැඳින නොසිටි මිනිසකු සමඟ විවාහවීම සඳහාය. උද්‍යෝගී හා ශුභවාදී අදහස් දැරූ ඈ ප්‍රීතිමත් විවාහ ජීවිතයක සියලු බලාපොරොත්තු ඇතිකරගෙන සිටි තරුණියක් වූවාය. නමුත් එය එසේ නොවන බව පැහැදිලි වූයේ විවාහ වූ දිනයේමය. ඉදිරි දස වසර සිය සැමියාගේ දුෂ්ඨ ප්‍රචණ්ඩත්වය ඉදිරියේ අඛණ්ඩ ශාරීරික හා මානසික හිංසනයට ලක්ව ඇයට ජීවිතය අශුභ සිහිනයක් විය. ආධාරයක් උපකාරයක් ඉල්ලා සිටීම සඳහා ඇයට කිසිවෙකු නොසිටියේය. බ්‍රිතාන්‍යයේ වෙසෙන තවත් බොහෝ ආසියානු ගැහැනුන්ට මෙන්ම ඇගේ පරම වගකීම වූයේද-ඉසාට්-පවුලේ නම්බුව රැකීමයි. 1989 වසර වන විට සම්පූර්ණ විඩාවට හා ව්‍යාකූල බවට පත්ව සිටි ඇය විඳවමින් සිටි වේදනාව දරා සිටීමේ හැකියාව ඉක්මවා ගොස් තිබිණි. දැඩි මානසික අවපාතයට ගොදුරුව සිටි ඈ තම ජීවිතය වෙත දුක්ඛිත බව කැඳවාගෙන ආ සිය සැමියාට එරෙහිව ක්‍රියාත්මක වූවාය. විවාහය ජීවිතාන්ත සිරදඬුවමක්ව තිබූ ඒ දුක්මුසු සිදුවීම් මාලාව කෙළවර වූයේ නීතිය මඟින් ඇය වෙත පැනවූ ජීවිතාන්ත සිරදඬුවමක් සමඟිනි. එහෙත් අවසානයේ ඇය නිදහස ලැබුවාය.