දිවි නසා ගනිමි මම

මම දැනුත් දැක්කේ
වැසිකිළිය පාදමෙහි කලු පාට
තිස් වසරක්ම සුදු පැහැය ටිකෙන් ටික දුරු වෙවී
ගොඩගැසුණු කලු පැහැය

නිතර සෙත් පිරිත් ඇසෙන
නුවර අසබඩ හරිත පෙදෙසක
පාලු නිවසක,මගේ කුටියෙහි
මේ දැනුත් තියෙන්නේ හිස්කම

අවසානයට ඊයේ කියා දිනයක් තිබිණ
මල් උයන් පෙනෙන මානයෙහි
මා දෙපා ඔහේ එසෑවී තැබිණ
සුපුරුදු තැබෑරුම දෙසින්
බලා නොබලා පියවර තැබිණ

කිසිවක වෙනසක් නුදුටුවෙමි
ඒ අවසන් නුවර සැරියෙහිදිත්
ඇතුළතින් පැසවන එපා වීමක් ම මිස
පාවෙන වලාවන් සමග
මගේ කුටියෙහි තෙත අඳුර වෙත
ඊයේ සන්ධ්‍යාවෙහි ඇතුල් වූයෙමි
තවත් දවසක් ගැන සිහිනයක් නැති
අතරමං වූවෙකු විලස

දැන් මේ මොහොතෙහිත් සිතෙන්නේ
වැසිකිළි පාදමෙහි තිස් වසරක් කැටි ගැසුණු අඳුර
මිස
දිවි නසා ගැනීමට අන් හේතුවක් මා හට සොයා ගත
නොහැකි වූ බව යි.