'ඒක හරි පාලු හවසක්
ඕළු මල් වත් පිපුණේ නැති දවසක්
පාරු ඔරු නැවතුනේ නැති
සේරුත් නිදිකිරපු දවසක්'

'රත්තරං හඳ එළිය වැටෙද්දී ගඟ උඩට
රත්තරං එපා කිව්වත් ඇහුණේ නෑ ඔහුට
රත්තරං බබෙක් කුස තුළ නිදනත'ර
අත් හැරුණි ආදරේ ගං දිය සරැළි පොඩි කර'

'ඉහිර ඉහිර දළ රළ උඩුගං බැලුවා
කොඳුර කොඳුර කී පෙම් කවි දිය කෙරුණා
සොඳුර,කියා සිපගත් තොල් පෙති රිදුණා
අඳුරු රැයක පත්තිනි සළුවත් ඉරුණා'

'වෙරළු අඹ,රසය දිවගට දැනෙන කොට
කඳුළු ගැලුවේ සයුරට ලුණුත් මුහු කොට
තෙපළු රළු වදන් මුහුණට එබී හැම විට
ළදරු පුතුත් හැඬුවා පෙකණිවැල සිඹ'

'ඕළු මල් පාට හවසක
ඕළු මල් නොපිපි දවසක
නොපිපුණු ඕළු කැකුළක
වැටී තිබුණා ඕළු පුතු පණ'