ටොම් සෝයර් කෘතිය, ඇමෙරිකානු ජාතික විශිෂ්ට ලේඛකයකු වන මාක් ට්වේන් ( 1835 – 1910) විසින් රචිත කෘති අතුරින් උසස්ම එකක් ලෙස සැලකෙයි. මෙය ලෝකය පුරා අතිශයින් ජනප්‍රිය වූවකි.

මිසිසිපි නදිය අසබඩ, රට මැදට වෙන්නට පිහිටි මිසුරි ප්‍රාන්තයේ හැනිබාල් නම් කුඩා නගරයේ සිය ළමා විය ගත කළ ට්වේන් මෙම කෘතියට පසුබිම් කරගත්තේ 1830 දශකයේදී ඔහු රස වින්ද ශාන්ත සුන්දර සරල ගැමි පරිසරයයි.

කථා නායකයා, එනම්, ඉතා කෙළිලොල් කුඩා කොලුවකු වන ටොම් සෝයර් දවස පුරා දඟකාරකම් හා තක්කඩිකම් කරන අයුරුත් අහිංසක කුඩම්මා රවටන අයුරුත් අතිශයින් හාස්‍යජනකය. ඔහු තමා වැනිම යහළුවන් සමග ගත කරන සරල සැහැල්ලු ජීවිතයත් එහිදී ඉතා සුළු සරල දෙයින් පවා මහත් වින්දනයක් ලබන අයුරුත් අපූරුය. ටොම්ගේ චරිතය නිර්මාණය කිරීමේදී මාක් ට්වේන් සිය ඇතැම් චරිත ලක්ෂණ සහ ජීවිතයේ ඇතැම්සි දුවීම් යොදාගෙන ඇත. කථාවේ නිරායාස ස්වාභාවික ගලායාමට මෙය හේතුවක් වී තිබේ.

වර්තමානයේ අතිශයින් කාර්යබහුල තරඟකාරී අවිවේකී ජීවිත ගෙවන අප තුළ , මේ සුන්දර ගැමි පරිසරයද එහි වසන චාම් සරල ගැමියන්ගේ පැවතුම්ද කුඩා ටොම්ගේ දඟකාරකම්ද මහත් චමත්කාරයක් විනෝදයක් උපදවන්නට සමත් වෙයි