Sally Grindley විසින් රචිත Spilled Water ග්‍රන්ථයේ සිංහල පරිවර්තනය..

මේ වයසේදී තමාට ඉගෙන ගන්නට හැකි බව සිතීම නිසා, විශේෂයෙන්ම මගෙන්, ලොකු තාත්තා ඔහුට නාකි මෝඩයා යි කීවේය.

"මේ කෙල්ලව ඉස්කෝලෙ යවන එක උඹ ළඟ තියෙන සල්ලි ටික නිකං නිස්කාරණේ නාස්ති කිරීමක්," ඔහු අප්‍රසාදය පළ කරමින් කීවේය, "බහුබූත ඇරෙන්න වෙන දෙයක් උඹට උගන්නන්න එයාට පුළුවනි කියලා විස්වාස කරං එයා එක්ක වාඩිවෙලා ඉඳගෙන උඹේ වටිනා කාලෙ නාස්ති කරන එක ඊටත් වඩා අපරාදයක්."

"සැතපුම් දහසක ගමන ආරම්භ වන්නේ ඔබේ දෙපය යටිනි," යි තාත්තා කාගෙදෝ කියමනක් උපුටා දක්වන අතර ඔහු අදහස් කළ දේ තේරුම් ගන්නට මා මහත් වෑයමක් දැරුවද, අපේ පාඩම් ඔහුගේ ආත්මය ස්පර්ශ කර ඇති බව ඔහුගේ ඇස්වල දීප්තියෙන් මට දැකගත හැකි විය.

"ඔයාගෙ තාත්තා අලුත් සෙල්ලම් බඩුවක් ලැබුණ පොඩි ළමයෙක් වගේ," යි අම්මා සිනාසුණාය.

"මේ පොඩි ළමයට කවදාවත් එයාගෙ අලුත් සෙල්ලම් බඩුව එපා වෙන්නෙ නෑ," යි තාත්තා පෙරළා උස් හඬින් සිනාසුණේය.

ඔහු කී දේ ඇත්තය. ඔහුට එය එපා වූයේ නැත. ඔහුට ඊට අවස්ථාවක් නොවීය. තාත්තා මිය ගිය අතර අපේ ජීවිතවල හිරු නිවී ගියේය.